Gubb og kanínur

Dyntir í Uglu

2006-04-25T12:42:00.000Z

Komin með nýja slóð: www.ugla.blog.is

2006-04-21T13:27:00.000Z

Karlapókerklúbbar sem banna svindl eru asnalegir.

Mér finnst gaman í póker.

2006-04-20T22:34:00.000Z

Uppáhalds tíminn minn í partýum er þegar langflestir eru farnir og þeir sem eftir eru orðnir mjög sjúskaðir. Allir sem eiga einhver skemmtiatriði eftir til að flytja eru orðnir of fullir til að muna að það var ekki nógu vel æft. Eða, í örfáum tilvikum, búnir að gleyma því að fólki fannst atriðið orðið þreytt eftir fimmtánda flutning. Það kemur stundum fyrir mig.

Einhvern tímann man ég einmitt eftir að hafa beðið lengi eftir að halda skemmtiatriði. Þegar um það bil tíu manns voru eftir söng ég eitthvert lag sem ég man ekki hvað var með ég man ekki hverjum (man bara að það var einhver skemmtilegur). Ég öskraði í míkrafóninn yfir lagið svo allir myndu örugglega heyra. Síðan man ég eftir að hafa ætlað að syngja lag númer tvö, en ég var allt í einu orðin ein á sviðinu og það var búið að kippa míkrafóninum úr sambandi. Ætli áheyrendurnir hafi upplifað tónlistarflutninginn öðruvísi en ég?

Að skilja hægri fótinn sinn

2006-04-16T22:10:00.000Z

Ég fór í fjölskylduboð hjá fjölskyldu Mads hennar mömmu í dag. Ég er ekki frá því að ég sé orðin helvíti sleip í dönskunni...

Ég skildi Idu til dæmis fullkomlega þegar hún sagðist einn daginn hafa "skilið" hægri fótinn sinn í vinnunni. Þess hékk hún heima allt fríið, las og tók því rólega. Þess vegna leyfði hún hægri fætinum að sitja uppi á stól allan tímann í veislunni og fór afar vel með hann að öllu leyti. Stundum strauk hún honum létt eins og hún fyndi til með honum. Þegar boðið var búið óskaði ég henni velfarnaðar og sagðist vona að einhvern daginn myndi hún skilja vinstri fótinn jafn vel.

Forstuvet/forstået, hver er munurinn?

Ég lék á als oddi og sagði hefðbundna brandara eins og maður gerir í svona fjölskylduboðum. Þeir fóru misvel í fólk. Ég hef alltaf haldið að "Nú ert þú yngsta dóttirin? Ég hélt að þú værir elst." væru bara svona standard procedure.

Ég sýndi á mér fleiri hliðar sem kristölluðu meðfædda kurteisi mína enn frekar. Sofnaði meðal annars í tvo klukkutíma yfir þessu fimm klukkutíma borðhaldi og hraut víst mjög hátt.

Annars skemmti ég mér mjög vel. Ég er líka búin að vera svo dugleg að læra að það stefnir allt í heilan frídag á þriðjudag. Sjáum til með það.

Milljarðamæringar eru aliþrestir í tívolí

2006-04-15T18:24:00.000Z

Ég brýt heilann mikið þessa dagana um það hvað ég á af mér að gera eftir menntaskóla. Ekki að ég kvíði því að útskrifast, þvert á móti.

En í dag fékk ég frábæra hugmynd sem mér líst vel á. Ég gæti orðið milljarðamæringur. Eins og þessi gaur(samt ekki eins sparsöm og hann). Það myndi henta mér mjög vel. Mér finnst nefnilega gaman að eyða peningum, en þá myndi ég einmitt eiga peninga til að eyða. Gaman þegar áhugamál manns passa svona vel við einhver störf.

Ég er í Kaupmannahöfn. Hún er svo deilig. Mamma og Mads dekra við mig eins og aliþröst. Við fórum í tívolí í gær. Ég fór í öll tækin. Ég fékk líka ís og vann beygjanlegan blýant af því öll börn fengu vinning þótt þau töpuðu. Ég borgaði 20 kr fyrir að brjóta fimm diska á einum bás. Síðan keypti ég mér rauða hárkollu og reyndi að vinna rauðan "I Love You" hjartabangsa. Starfsfólkið hélt að ég væri fjórtán ára. Það fannst okkur mömmu fyndið.

Flottræfilsháttur, Vaudeville og tvíræðir textar

2006-04-14T00:03:00.000Z

Á morgun fer ég til Danmerkur að hitta mömmu. Í vetur er ég búin að skreppa til útlanda í hverju einasta skólafríi. Einhvern tímann hefði maður nú kallað það flottræfilshátt (segi ég eins og ég sé fjörgömul og hafi lifað tímana tvenna).

Í gær fékk ég nýjan kjól. Hann er svolítið eins og Vaudeville kjólarnir sem barnastjörnur á Broadway voru í þegar Vaudeville var í tísku. Vaudeville voru eins konar söngleikjasketsj. Mjög stuttir söngleikir.

Uppáhalds myndin mín þegar ég var ung og geðveik var söngvamyndin Gypsy með Bette Midler í aðalhlutverki. Á Laugarásvídjóleigunni var til eitt eintak af myndinni og ég var sú eina sem hafði nokkurn tímann leigt hana, en ég leigði hana alltaf reglulega.

Gypsy fjallar um óþolandi sviðsmömmu sem vill að dætur sínar meiki það sem Vaudeville stjörnur. Yngri dóttirin hefur mikla leikhæfileika og mamman lifir fyrir hana en kann illa við þá eldri. Áætlanir mömmunnar fara alltaf í vaskinn og allir gefast upp á henni. Í lokin slær "hæfileikalausa dóttirin" í gegn sem strippari. (Í myndinni er það alveg álíka saklaust og að vera leikkona, kannski ögn brattara. Það er allavegana enginn Geiri í myndinni og stripparinn endar sjóið yfirleitt á því að taka af sér hanskana. Ég hef séð alvöru strippsjó á Íslandi og eftir á að hyggja var kannski dregin upp ansi saklaus mynd af nektardansi í myndinni).

Annars er mikil tvíræðni í því að lagið sem litla stelpan syngur í byrjun myndarinnar í Vaudeville atriði er það sama og systir hennar syngur fullorðin kona sem strippari. Svona er textinn:

Let me entertain you
Let me make you smile
Let me do a few tricks
Some old and then some new tricks
I'm very versatile
And if you're real good
I'll make ya feel good
I want your spirits to climb!
So let me entertain you
And we'll have a real good time!

Ég má alveg vera bitur

2006-04-07T23:13:00.000Z

Af hverju í andskotanum fór ég ekki í leikfélagið í vetur? Hvað hélt ég eiginlega að ég þyrfti að gera við tímann? Eitthvað annað en að spila meiri kapal í tölvunni?

Íslenski fjölskyldusirkusinn var æði. Nema að þau hefðu alveg mátt láta leiðinlegu þingkonuna vera úr einhverjum öðrum flokki en Vg.

You can have the kids

2006-04-07T11:58:00.000Z

Þetta er flott síða. Það þarf auðvitað ekki að taka það fram að Byssupissi verður bætt á þessa síðu innan tíðar. Um leið og búið er að taka upp allavegana eitt lag til að setja á heimasíðuna okkar. Berjum Geira er líka alltaf liðtæk í hvaða gigg sem er auðvitað.

Vill einhver lána mér kennitölu?

2006-03-30T17:56:00.000Z

Ég á í stökustu vandræðum með að ákveða hvað er mest spennandi að gera næsta vetur. Upphaflega planið var að fara í Leiðsögumannaskólann og læra alls konar töff hluti eins og skyndihjálp, gprs staðsetningarmælingar og fleira. Það kom þó á daginn að til að eiga rétt á skólavist þarf maður kennitölu upp á að minnsta kosti 21 ár. Getur einhver séð af kennitölu í eitt ár eða svo?

En ef ég kemst ekki í Leiðsögumannaskólann eru alls konar skemmtileg námskeið í boði. Hvernig væri að læra fornleifafræði, byrja í FÍH, læra íslensku, málvísindi, lögfræði (oj), þýðingafræði, tómstundafræði eða uppeldis- og menntunarfræði?

Eða kannski bara fara í fallhlífarstökksskóla Ástralíu?

Framfarir í partýhegðun

2006-03-19T16:05:00.000Z

Þegar maður hefur vit á því skakklappast heim þegar glös eru farin að brotna, og sökin liggur að hluta til hjá manni sjálfum, þá hefur maður lært ýmislegt af reynslunni. Ég held ég sé að verða eins og skynsöm ugla.
Mæli samt með keleríi í bílskotti úr Kópavoginum á leið í 101.

Hefnd og hatur

2006-03-13T19:08:00.000Z

Ég fékk símann hans Kára lánaðan. Sendi sms til kærustunnar hans frá honum og spurði hvort hún vildi ekki koma í þrísom með fyrrverandi kærustunni hans. Hefndin er sæt. Mér leið svo miklu, miklu betur eftir þetta.

Nú er að finna leið til að tækla strákana í Fréttapésa á svipaðan hátt. Hugmyndir?

MH - Skóli dauðans

2006-03-13T16:45:00.000Z

Fréttapési í MH er greinilega álíka vafasamur fjölmiðill og DV. Fór í viðtal til þeirra og þeir sneru út úr því sem ég sagði eins og ég veit ekki hvað, það er svo mikið helvítis bull sem stendur þarna eins og það sé haft eftir mér. Ég hata, hata, hata Fréttapésa. Sem betur fer er honum bara dreift í 300 eintökum.

Muna: Bíta strákana í Fréttapésa á barkann.

Einhver mjög óprúttinn, sennilega Kári, læddist inn á msnið mitt á meðan ég var í tíma og spjallaði við þann sem ég var að spjalla við. Þegar ég kom til baka og leit á skjáinn hafði "ég" sagt: "Mér er svo illt í píkunni" við einhvern kunningja minn.

Muna: Eitra fyrir Kára í næsta matarboði Beneventum með laxerolíu.

Karíus í tímans tönn

2006-03-13T13:52:00.000Z

Sumarbústaðaferðir eru svo skemmtilegar. Vinstri græn eru svo skemmtileg. Það er svo gaman að syngja. Einstaka fundir eiga það jafnvel til að vera skemmtilegir, sérstaklega ef þeir eru haldnir í sumarbústað og hópurinn fer í samgöngu um hverfið eftir á. Enda allir svo hlynntir umhverfisvænum samgöngum. Og fimm aura virðis útúrsnúningabröndurum.

Bestu setningu úr dægurlagatexta fyrr og síðar á Gunnar Guttormsson: "Það er Karíus í tímans tönn". Hann er svo skemmtilegur.

2006-03-02T11:37:00.000Z

Samkvæmt sálfræðiskýrslunni hennar Sigrúnar Þorsteins fyrir sálfræði 203 er fylgni á milli þess að vera góður í ensku og að vera heimskur. Þetta kemur mér ekki á óvart enda er ég hreint afburðagáfuð en þó mjög léleg í ensku. Mér gekk fjarskalega illa á enskuprófi um daginn en nú sýti ég það ekki lengur.

Næst þegar einhver segir eitthvað mjög heimskulegt ætla ég að svara: ,,Þú hlýtur að vera mjög góður í ensku".

2006-02-27T15:14:00.000Z

Yfirlit yfir líf mitt síðan síðast:
Fór í fallhlífarstökk. Kom heim. Er mömmulaus en ekki lengur móðurlaus. Tók sýklalyf í mánuð við bakteríusýkingu djöfulsins en er öll að koma til. Krullaða hárið er líkara dreddum en í upphafi. Þarf eiginlega að klippa það. Þori samt ekki til sama hárgreiðslufólks og greiddi síðustu flækju úr hárinu mínu.

Rakel er byrjuð að blogga.

Namibia

2005-12-30T21:41:00.000Z

I gaer komum eg heim (til baejarins thar sem eg gisti) ur safariferd. Ferdafelogum minum fannst augljoslega toff ad deyja a ferdalagi med thvi ad keyra i atta klukkustundir i stadinn fyrir kosy stopp. Faeturnir minir eru thess vegna ad glidna i sundur. Vont ad vera minnstur af fimm ef hopurinn hefur adeins einn bil til umrada. Midjan i aftursaetinu bydur ekki upp a ad retta mikid ur loppunum.

A morgun hyggjum vid a fallhlifarstokk. Spurning hvort ferdafelagar minir guggni a thvi. Ekki er eg lofthraedd. Nema i rullustigum. Og kannski i blokkum. Hopp ur thrjatiu thusund feta haed verdur piece of cake.

Nuna er nett fylleri. Ekki eg, bara Halli og Matti. Eda svona.

Krullhærð

2005-12-19T21:52:00.000Z

Ég er svo ógeðslega sæt að ef ég væri einhver önnur en ég þá myndi ég byrja með mér.

Bless og góða ferð, Ugla. Skemmtu þér vel í Namibíu.

2005-12-15T19:57:00.000Z

Mér finnst alltaf svo ótrúlegt í hvert einasta skipti að loknum prófum þegar ég átta mig á því hvað ég þurfti nú í raun fátt að gera þá önnina. Hefði getað lokið því af miklu fyrr og hætt að drolla svona. Það væri nú skapbætandi. Annars er ég ekkert skapvond.

Eftir fimm daga verð ég í flugvél á leiðinni til Namibíu. Ekki held ég að það verði leiðinlegt. Í Namibíu á ég við. Stundum er leiðinlegt í flugvélum. Nema maður drekki mikið eins og mamma þegar við flugum frá London fyrir ári síðan (upp á dag). Hún keypti allt í Saga boutique bæklingnum á meðan ég svaf. Þegar við lentum í Keflavík fyllti hún tvær innkaupakerrur í fríhöfninni. Hún var líklega í blakkáti vegna þess að hún mundi ekkert hvað hún keypti. Í heilan mánuð eftir á var hún alveg steinhissa á öllu sem hún fann heima hjá okkur. Dæmi:

Mamma: Ugla, hver á þennan síma?
Ugla: Þú keyptir hann í fríhöfninni, manstu?
Mamma: Nei, var það? Ég man ekkert eftir því.

Eða:

Mamma: Eigum við ekki að kaupa nýja Eivarar diskinn?
Ugla: Þú keyptir hann í fríhöfninni, manstu?
Mamma: Nei, ha. Ég man ekkert eftir því.

Rökhugsun þess sem forðast heimilisverk

2005-12-05T21:33:00.000Z

Ég var að vaska upp og skar mig í puttann á brotnu glasi.
Ályktun: heimilisverk eru hættuleg.

2005-12-04T22:23:00.000Z

Það getur verið vandkvæðum bundið að skrifa ritgerð á norsku. Ekki síst ef maður kann ekki norsku. Af hverju þarf ég að taka þrjá áfanga í norsku? Má ég ekki taka malaísku í staðinn?

2005-11-30T11:26:00.000Z

Ég hef einhvern veginn alltaf upplifað mig sem rokkstjörnu. Það fer samt ansi lítið fyrir rokkstjörnuferli mínum. Hann er allavegana frekar dapurlegur.

Einu sinni var ég beðin um að vera í hljómsveit sem hét Blöðrukisi. Í henni voru Maggi trommari, Högni Egilsson og Þorsteinn Kári. Mér fannst það hrikalega asnalegt hljómsveitarnafn. Við spiluðum á einum tónleikum en það var heiftarlegur ágreiningur innan hljómsveitarinnar sem ekki tókst að vinna úr. Tja, eða aðallega milli mín og gítarleikarans sem þráaðist við að finna annað nafn (ég stakk upp á nafninu Byssupiss 2) og skipaði mér að fríkka mig fyrir tónleika.

Eftir stórkostlega frammistöðu sem íhlaupahljómborðsleikari á söngvakeppni framhaldsskólanna var ég viss um stöðu mína í hljómsveitinni Hjaltalín. Nokkrum vikum síðar sá ég auglýsta tónleika með Hjaltalín á auglýsingaplakati niðri í bæ. Þá samdi ég hljómfagra lagið með torræða nafninu: "Ég hata Hjaltalín".

Stuttu síðar var mér boðið í hljómsveit sem átti enn eftir að fá nafn. Ég stakk upp á nafninu Byssupiss 3. Svo mætti ég á æfingu og þótti sökka einstaklega feitt. Þá var ég rekin. Hljómsveitin var skírð Djöflarnir frá Keflavík.

Enn er þó ónefnd hljómsveitin sem á hug minn allan. Ég hef verið ótrú og daðrað við aðrar hljómsveitir sem hafa svo bara farið illa með mig. Byssupiss er hljómsveitin í lífi mínu. Að vísu takmarkast aðdáendahópurinn við ákveðin borð í Norðurkjallara Mh. Og ef ég gúgla hljómsveitinni koma upp háðsglósur um sveitina á bloggsíðum kunningja. Þar komum við enn að því hversu dapurlegur þessi rokkstjörnuferill minn ætlar að vera. En Byssupiss er þó altso alltaf til í að heita Byssupiss og spila góð lög eins og "Ég hata Hjaltalín". Hér er textinn:

Ég var hluti af Hjaltalín,
þessi saga er sagan mín.
Ég hef lifað þraut og pín,
djamma oft með kókaín.

Hjaltalín,
þeir eru svín,
þetta er ekkert grín.
Nei þessi skilaboð eru svo brýn,
eru svo brýn,
eru svo brýýýn.

Ég er hér og sólin skín,
þessi saga er sagan mín.
Ég er búin að drekka soldið vín,
verð trúbador þar til dagur dvín.

Hjaltalín,
þeir eru svín,
þetta er ekkert grín.
Nei þessi skilaboð eru svo brýn,
eru svo brýn,
eru svo brýýýn.

Tvær mögulegar lausnir á pakkavandamálinu

2005-11-25T00:08:00.000Z

1. Sigrún stakk upp á því að ég myndi mæta 15. desember til fólks með pakka. Gefa það um leið sterklega í skyn að það hafi 4 daga til að kaupa gjöf og koma henni til mín. Klassíska samviskubitsaðferðin.

2. Bjóða fólki í jólapartý með leynivinaleik. Láta fólk draga nafn leynivinarins og kaupa jólagjöf. Sérstakur fítus verður að helmingur miðanna verður með mínu nafni á. Passa samt að viðra þessar hugmyndir ekki á blogginu fyrirfram.

2005-11-23T16:03:00.000Z

Ég var að átta mig á því að fyrst ég verð úti í Namibíu um jólin á sumt fólk eftir að taka því eins og það sleppi við að gefa mér jólagjafir í ár. Mæ ess sko. Þið kaupið þær bara fyrr þetta árið. Það er líka engin afsökun að vera í hryðjuverkalandi. Talandi um gjafir. Allir sem eiga afmæli um þessar mundir, nær og fjær, til hamingju.

2005-11-19T18:53:00.000Z

Hvernig finnst ykkur að skrifa niðurlag á íslenskuritgerð undir áhrifum áfengis og fatta svo næsta morgun að lokaorðin voru: "... og þess vegna er svo gott að fróa sér mikið, sérstaklega ef maður er stelpa"?

2005-11-19T15:04:00.000Z

Í gær fór ég út að skemmta mér. Mér var ekki hleypt inn á Ölstofunni. Ég þurfti að rökræða lengi við barþjóninn á Næsta bar til að vera hleypt inn. Ég þarf greinilega að útvega mér fölsuð skilríki. Er samt kannski á síðasta séns með það, verð tvítug eftir þrjá mánuði.

Svo var ég undir smásjá þjónanna allan tímann sem ég var inni á Alþjóðahúsinu sem hleyptu mér inn með því skilyrði að ég drykki ekkert áfengi. Þegar ég skrapp á klósettið settist einn þjónninn á borðið hjá félögum mínum. Hann sagði þeim að þetta með aldurinn væri bara tylliástæða til að banna mér að drekka. Hann sagði að síðast þegar ég var á Kúltúra hafi ég sagt "fuck you bitch" við einn barþjóninn þegar átti að reka mig út. Ég neita að trúa því. Hver segir "fuck you bitch", aðrir en fávitar?

2005-11-14T21:20:00.000Z

Norðmenn eru svo miklir töffarar.

2005-11-09T17:35:00.000Z

Ég held að Önnu þyki ekkert vænt um mig lengur. Hún er bara búin að gleyma mér einhvers staðar úti í Jórdaníu.

2005-11-09T17:08:00.000Z

Mér hafa alltaf þótt krækjulistar í stafrófsröð flottari en aðrir. Ástæða þess að ég hef fram að þessu ekki gert tilraun til að breyta mínum er að ég er svo léleg í stafrófinu. Það sannaðist til dæmis áðan þegar ég stillti Birni Reyni fyrir ofan Baldvin á listanum.

Ég ætla samt ekki að laga þetta strax. Finn ábyggilega enn fleiri villur og verð pirruð. Reyni bara að telja mér trú um að þessi brenglun geri listann bara fallegri.

2005-10-31T17:35:00.000Z

Ég er orðin alveg fjarskalega morgunfúl. Í morgun leit ég út eins og fólkið sem sparkar í ketti þegar ég þrammaði urrandi í strætó. Þegar ég kom í skólann öskraði ég líka á þann sem tilkynnti mér að fyrsti tíminn hefði fallið niður. Eins og ég er geðgóð yfirleitt.

En þegar ég var sest í sófann í skólanum var ég bara fegin að hafa skemmtilegt fólk til að tala við. Og kaffi í ofanálag. Alveg sama þótt ég þyrfti að slæpast í hartnær tvær klukkustundir áður en ég þurfti að mæta í tíma. Kannski ætti ég að taka morgninum með meiri bjartsýni hér eftir.

2005-10-27T19:25:00.000Z

Ég á frábært hljómborð sem ég er tilbúin til að selja fyrir slikkprís.

Snjóbrettið mitt er líka til sölu með skóm og öllu.

Áhugasamir mega hringja í 8990980. Ég tek fram að þetta er fyrir eintaklega gott málefni, jólaferð til Namibíu.

L

2005-10-05T11:18:00.000Z

Ég er eitthvað svo L þessa dagana.

2005-09-24T18:53:00.000Z

Nuna er eg i Danmorku i ekki omerkilegri erindagjordum en ad ritstyra songbok. Reyndar fara fundirnir fram a Malmo svo eg tek lest yfir landamaerin daglega. Eg rembist vid ad tala skandinavisku allan lidlangan daginn.
Danmork er skemmtileg, tveir strakar kolludu a mig i gaer a lestarstod og budu mer i poker i lokadri bud. Svithjod er lika skemmtileg. I dag tyndist eg i klukkutima a medan hinir fundudu. Eg var ad leita ad kaffi. Audvitad var svo til kaffi i fundarhusinu.

2005-09-18T12:10:00.000Z

Ég fann í einni skúffunni gamla dagbók, merkta 31. janúar 2004, Sitiawan, Malasíu. Ég hef greinilega haft margt fyrir stafni í útlandinu, var búin að búa til heilt tungumál. Fannst ég auðsýnilega fyndnust í heimi og bjó til "mh-fall". Ég er ánægð með að vera svona töff.

Heilaslettur

2005-09-14T12:10:00.000Z

Urðuð þið vör við fellibylinn Maríu? Hún feykti mér fram af hjólinu mínu og beint á nebbann. Ég fann undir eins að ég hafði brákast á nefinu og sá heilasletturnar leka út á götu rétt áður en hjólið skall á hausnum á mér. Núna get ég ekki sagt s. Ekki g heldur. Skrambinn. É meina krambinn.

Gaman að lifa

2005-09-08T16:36:00.000Z

Busaball í gær. Gekk furðu illa að útvega mér bús. Fór meira að segja upp á kennarastofu og athugaði hvort einhver þar fengist til að fara í ríkið fyrir mig. Það gekk afar illa. Fékk jafnvel að heyra að ég væri siðblind.

Fór því niðurlút á ballið, bjóst við ælusvælu og litlu fjöri. Sem betur fer var það kolröng ályktun því ballið kom skemmtilega á óvart. Mér finnst nefnilega yfirleitt ekkert svo gaman á böllum. Dansklúbbur útskriftaraðals og busa var berfættur allan tímann og ef einhver dirfðist að dansa í skóm var viðkomandi umsvifalaust klæddur úr þeim og sokkunum. Ógurlega gaman.

2005-08-31T13:43:00.000Z

Ég er ekkert smá bitur. Busatónleikar í Norðurkjallar og Byssupiss ekki beðin um að spila. Ekki einu sinni þegar við báðum um það. Ekki einu sinni þegar við grátbáðum um það.

Spurning hvað við tökum til bragðs. Held að við ættum að halda einkapartý fyrir busa. Gefa þeim frítt áfengi ef þeir segja að Byssupiss sé æði.

Annars er skólinn byrjaður. Ég vona að þessar vegaframkvæmdir við Miklubraut taki skjótt enda. Mér líður eins og áhættuleikara þegar ég hjóla í skólann.

2005-08-21T20:45:00.000Z

Mamma laug því að mér í morgun að Vala, fimm ára frænka mín, hefði verið hlekkjuð við vinnuvél í sólarhring þegar fjölskyldan fór upp á Kárahnjúka. Að löggan hafi sparkað í sköflunginn á henni. Ég var alveg í sjokki. Hvað segir það um mig að ég gleypti við þessu?

2005-08-21T20:12:00.000Z

Ég er frábær. Ég fékk tíu í jarðfræði í sumarskólanum. Er að deyja úr sjálfsdýrkun. Veit ekki alveg hvernig ég á að láta sem flesta vita af þessu. Kannski skrifa lesendabréf í Moggann eða Fréttablaðið.

Sumir dagar

2005-08-03T19:36:00.000Z

Í morgun hringdi fjárkúgari í mig. Hann sagði að af því að einhver maður út í bæ gerði mistök og lagði pening inn á bankareikninginn minn þarf ég ekki aðeins að borga þann pening til baka heldur sjötíu þúsund krónur til viðbótar. Kanntu annan?

Auk þess gekk sögulega illa í vinnunni í dag. Fékk ábendingu um að kannski vildi fólk ekki skrá sig í unicef hjá mér af því ég var í svo ljótri úlpu. Þá fór ég úr úlpunni. Það gerði ekki gæfumuninn.

Úr bálki hrakfalla

2005-07-27T21:06:00.000Z

Í gær leið mér eins og ógæfukonu. Ég var í göngutúr, lagði frá mér töskuna og hellti steinum úr skónum. Síðan hélt ég áfram að labba en tók ekki upp töskuna. Reikaði síðan um bæinn í leit að fólki til að bögga þangað til ég frétti að einhver góðhjartaður skilaði töskunni til löggunnar. Þá sótti ég töskuna og fór heim.

Áðan lét ég renna í bað fyrir móður mína. Hvorug okkar áttaði sig fyrr en baðherbergið fylltist af vatni. Hefðum kannski átt að bíða í klukkutíma til viðbótar, saga holu á hurðina og nota baðherbergið sem sundlaug.

Fokking Umno

2005-07-25T00:48:00.000Z

Ég hef sjaldan haft mikla þolinmæði fyrir UMNO gaurum. UMNO er "aðal" stjórnmálaflokkurinn í Malasíu. Nú eru þeir að springa á limminu af því að sumir háskólanemar hafa ekki næga sympatíu fyrir Flokknum og gætu jafnvel tekið upp á því að kjósa annað. Það þarf auðvitað að koma á fót stofnun sem bregst við þessari firru og UMNO-serar liðið.

Ef ykkur vantar lykilorð til að lesa greinina er notendanafnið nafnið mitt og lykilorðið mikkelina.

Til hamingju með afmælið Ugla

2005-07-24T20:33:00.000Z

Það er svo gaman að eiga afmæli. Það er líka gaman að fá afmælisgjafir. Það er líka gaman þegar afmælissöngurinn er sunginn fyrir mann.

Um daginn hitti ég Ítala. Ég talaði við hann á ítölsku. Hann var mjög þolinmóður þó ég kynni bara að segja þrennt á ítölsku auk margra klassískra tónlistarorða. Þetta var svona: "Ég vil læra ítölsku. Ég heiti Ugla. Moskítófluga?" Honum hefur örugglega þótt þetta athyglisverður ísbrjótur því við töluðum lengi saman. Ég svaraði alltaf einhvern veginn svona: "Molto! Da capo al coda." Svo böðuðum við alveg jafn mikið út höndunum.

Trendsetterinn Snoop

2005-07-18T12:59:00.000Z

Er það tilviljun að sömu helgi, strangt til tekið sama dag, og þekktur pissari kemur til landsins og heldur tónleika skuli vera pissað á mig í fyrsta og eina skiptið hingað til?

2005-07-16T02:29:00.000Z

Hjaltalín má éta skít, hoppa ofan í drullupoll, gubba upp í munn félaga sinna með sama lundarfar, smjatta á beinum hver annars, falla á mætingu, falla í lífsleikni, vera nafngreindir í útvarpi fyrir eigin skít og svínarí og að lokum verða útskúfaðir úr samfélagi hinnar heilögu köngulóar.

Hvalir í búri

2005-07-14T18:00:00.000Z

Í morgun hélt ég að hvalaskoðun færi fram innandyra, að þetta væri svona eins og á sædýrasöfnum. Nú veit ég betur. Ég er alltaf að mis eitthvað.

2005-06-29T22:44:00.000Z

Þegar fólk hefur svo sjúklegan áhuga á peningum að það þarf að kaupa til dæmis þrettán Boeing 747 flugvélar til einkanota, af hverju er ekki litið á það eins og hvern annan alkóhólisma og nánustu aðstandendur leggja sig fram við að beina þráhyggjunni á eðlilegri brautir eins og til dæmis í Krossinn eða skák?

2005-06-27T01:42:00.000Z

Ég er hrædd um að sá sem skrifaði jarðfræðibókina mína hafi ekki minna dálæti á tölunni þremur heldur en Ásatrúarmenn. Bókstaflega öllum fyrirbærum má víst skipta í þrjá flokka.

2005-06-18T21:32:00.000Z

Sigríður Tulinius þorði loks að segja mér hræðilega sögu frá því hún vann í Pennanum þegar við vorum 16 ára. Þá benti yfirmaður hennar á mig og sagði henni að passa sig - ég væri sko stelisjúk. Það hafði hún lesið í viðtali við mig og ekki náð brandaranum. Sigga sagði að ég hafi meira að segja verið á svörtum lista. Nú skil ég af hverju starfsfólkið horfði alltaf svona skringilega á mig og hvers vegna mér er alltaf sagt að það vanti ekki starfsfólk þar.

2005-06-15T22:38:00.000Z

Væri ekki fyndið ef lög myndu ekki gilda í sumarfríum? Svona eins og þingið fer í sumarfrí. Eða eins og það er óþarfi að borga í stöðumæla á vissum tímum. Ef við myndum til dæmis ekki hafa tollverði á Keflavíkurflugvelli í júlí. Svo myndi fólk segja; "Ég meika ekki að búa í Danmörku, þar þarf fólk sko að fylgja lögum í SUMARFRÍINU sínu".

Ég er ekkert smá sæt rauðhærð. Aumingja Kanadafararnir, sjá mig ekki svona fína.

2005-05-28T17:59:00.000Z

Aðdáendaklúbbur Laurynar Hill - tilkynning

Þessi síða á skilið að verða upphafssíða á heimatölvum allra meðlima í aðdáendaklúbbi Laurynar Hill. Félagið átti upptök sín í MH og hefur það að markmiði að fá tónlistarkonuna til þess að spila í Norðurkjallara. Það er þó ekki skilyrði fyrir inngöngu að vera í MH eða tengjast honum á nokkurn hátt. Þeir sem vilja ganga í félagið geta skráð sig á athugasemdakerfinu hér fyrir neðan.

2005-05-28T17:10:00.000Z

Stjórnarandstaðan myndar stjórnarmeirihluta - Áætlun B)

Ég fékk hugljómun, Gunnar Örlygsson á heiðurinn af henni. Þetta með að þingsæti fylgi þingmönnum opnar ýmsa möguleika. Ég er með fullkomna áætlun sem miðar að því að fella ríkisstjórnina. Næstu alþingiskosningar verða Master Plan. Meðfram öflugri kosningabaráttu er að sjálfsögðu nauðsynlegt að skipuleggja öfluga varaáætlun og þá er okkur ekkert að vanbúnaði.

Við fáum hundruð vinstrimanna til að sigla undir fölsku flaggi og ganga í Sjálfstæðisflokkinn eða Framsókn. Með mútum og fyrirgreiðslum tryggjum við að stór hluti framboðslista ríkisstjórnarflokkanna samanstandi af vinstrifólki í dulargervi. Við getum haft svona starfsmann sem vinnur í neðanjarðarbirgi undir alþingishúsinu og sendir þingmönnum skilaboð með útvarpsbylgjum sem þeir móttaka í tæki sem er ígrætt í gervijaxla. Aðeins gervitannaútvörp verða nægilega öflug til að anna einmitt þessari tíðni.

Ef kosningabaráttan klikkar þá grípum við til áætlunar B). Þó ekki undir eins, látum kannski líða upp í eitt ár eða svo. Neðanjarðarstarfsmaðurinn sendir skilaboð til þingmanna. Eftir að þeir hafa tekið við skipunum tilkynna þeir opinberlega einn af öðrum að þeir hafi skipt um skoðun af því að ríkisstjórnin hafi færst til hægri. Einhver háfleygur vitnar í Snorra Eddu: "Hver hefur loft allt lævi blandið". Annar slettir latínu eins og Steinn Steinarr: "Sic transit gloria mundi - einu sinni var hér frægur flokkur!".

Allir með tölu, kannski tíu þingmenn úr Framsókn og Sjálfstæðisflokki, skipta sér á Vinstrihreyfinguna grænt framboð, Samfylkinguna og Frjálslynda. Þá er ríkisstjórnin fallin á miðju kjörtímabili.

2005-05-24T00:57:00.000Z

Ég mæli með að allir lesi ritgerðina sem ég, Elín og Dísa skrifuðum saman í barna - og unglingabókaáfanganum sem við vorum í í vetur. Hún fjallar um bækur Jostein Gaarder. Það mætti kalla ritgerðina væmna en við viljum meina að hún sé bara hugljúf.

Ef íslensku stafirnir sjást ekki þá veljið þið view í toppstikunni, farið í encoding og veljið þar unicode.

Svo er bara að ausa verkefnið lofi í kommentakerfinu (sem er hálf einmanalegt núna).

2005-05-23T19:52:00.000Z

Merk tíðindi

Ég er ekki fallin í stærðfræði. Það einfaldar skólagöngu mína alla. Nú fæ ég mikilmennskubrjálæði og held að ég geti allt. Flestar einkunnirnar voru líka ósköp góðar og ég er ánægð.

Annars er ég grútspæld yfir því að fá sjö í sögu. Hvers konar fasismi er eiginlega að taka fullkomlega ásættanlegar einkunnir nemenda og margfalda með mætingarprósentu? Sérstaklega þegar ákveðnir nemendur eru með 0,81 í mætingu. Og til hvers var saga sett í fyrsta tíma tvisvar í viku? Örugglega sérstaklega til að ergja mig.

2005-05-17T20:17:00.000Z

Ég lýsi frati yfir sjálfa mig. Það er of auðvelt að plata mig til að gera hvað sem er. Þá sérstaklega þegar ég er mjög léleg í því sem ég er beðin um að gera.

Dæmi: Ég er beðin um að kenna stepp (ég hef aldrei sótt stepptíma) eða syngja djasslag í sjónvarpinu - ekki málið, segir Ugla þá og gleymir í örskotsstund að hugsa um orðsporið.

Hámark stundarbrjálæðisins var þó rétt áðan. Anna Pála hringdi í mig.

Anna Pála: Ugla, viltu gera mér ofsalegan greiða? Ég er í miklum vandræðum.
Ugla: Já auðvitað, ekkert mál. Hvað er það?

Anna Pála: Þú þarft að mæta á morgun í spurningakeppni á Talstöðinni á móti Katrínu Jakobsdóttur.

Ugla: Ertu að grínast?
Anna Pála: Nei, gerðu það. Ég þarf sko að mæta á fund hjá Lánasjóðnum...
Ugla: Jæja ókei, ekkert mál.

Ég trúi ekki enn að ég hafi samþykkt þetta. Þá er bara að bíða og vona að allar spurningarnar snúist einungis um Malasíu. En í kvöld er það bara ég og geographyolympics.com

Og ef þið hafið áhuga á að hlusta á mig niðurlægða þá hvet ég ykkur til að kveikja á Talstöðinni um eftirmiðdaginn á morgun.

2005-05-12T22:33:00.000Z

Af stærðfræðiprófi

Í gær fór ég í stærðfræðipróf. Aldrei á ævinni hefur mér gengið jafnilla á prófi - nema kannski þegar ég fór í próf í malaísku fyrir Malasíubúa þegar ég var búin að vera í mánuð á landinu.

Ef ég fæ allt rétt sem ég reiknaði á prófinu þá er ég líka fallin, held ég hafi klárað svona 40%. Ég held að einkunnaspjaldið mitt verði afar athyglisverð lesning þetta árið, mjög litríkt. Mér finnast einkunnaspjöld sem eru svona einsleit, alltaf með sömu tölunum, verulega leiðileg aflestrar. Af þeim sökum legg ég mig fram við að sýna af mér misgóðan námsárangur.

2005-05-07T15:19:00.000Z

Hann sagðist vera kokkur en er hann kannski seiðkarl?

Mamma mín er að fara til Danmerkur að hitta kærastann sinn sem er danskur. Hann mátti nefna þrjá hluti frá Íslandi sem hún átti að útvega. Fyrst nefndi hann þorsk sem er kannski skiljanlegt þó það sé vissulega óeðlilegt. Síðan var það einhver geisladiskur held ég. Það þriðja sem hann nefndi (í fyllstu alvöru) var kríufjöður.

Ég sé mömmu alveg fyrir mér að reyna að slíta fjöður af kríu. Mamma ætlar að biðja hann um veiðihár af ljóni.

Þetta hljómar svona eins og í ævintýri. Ég bað mömmu að finna fyrir mig dyn kattarins, rætur fjallsins og skegg af konu í Danmörku.

13 ára biðtími

2005-04-26T22:19:00.000Z

Í dag spurði ég stelpu sem flutti til Íslands frá Víetnam hvort hún ætlaði að kjósa í næstu kosningum. Hún hló bara að mér og sagðist bara búin að vera hérna í 4 ár.
„Maður þarf að hafa verið með landvistarleyfi í sex eða sjö ár til að fá ríkisborgararétt.“
Mér var ekki kunnugt um það og spurði hvort hún ætlaði þá að kjósa þegar hún fengi ríkisborgararétt.

„Nei svo þarf maður að bíða í fimm ár í viðbót eftir að fá full réttindi, eins og til dæmis að kjósa. Það er til að maður aðlagist fyrst.“

Þetta er óhugnanlegt. Ekki getur þetta verið svona í öðrum löndum eða hvað?

Byssupissí's gada gigí

2005-04-26T22:15:00.000Z

In a Öglí, in a Sigí, in a Gömí
-Byssupissí's gada gigí!